🐲半馬拉松龍潭錦標賽🚣🏻♀️
唔可以唔記錄嘅一場賽事！
由一開頭見到有呢個比賽，心諗會唔會扒足全日㗎😱
到開始練習，慢慢1K1K咁加上去，原來又唔係想像中咁辛苦姐☺️
到比賽當日，先真正齊曬腳，落艇時候先識肴🤣，比賽過程更加係緊張刺激！
半馬混合組總共有6隊參賽隊伍，我地排第二線。槍聲響起，右手邊第一線嘅健龍已經衝左出黎，望住佢地嘅背影，心諗點可以咁快嫁.....
而左手邊嘅四線 (挑戰龍) 同六線 (奧斯卡鳳凰龍)就一齊平排拍住扒，去到橋底前，六線都已經衝左上前，帶領住亞軍嘅位置，剩返落黎，就得我地同四線一直拍住去扒落去，扒到去第一個浮標前，我地係稍為領先半條龍，不過四線有強大嘅抄手加持，一轉灣就追前返一條龍😱
(真心強，明明我地船身同泡嘅距離大約只得6-7米，佢地都可以內灣扒頭，而且超流暢~我學十世都追唔到嘅技術......)
既然過左，就由得佢繼續過，我地繼續扒自己嘅速度，由耶魯發號司令，令大家不慌不亂，keep住速度之如，大家仲可以輪流休息補給，中間仲可以唱歌吹水，入到最後嘅一個灣，有人問：「大家仲有冇力丫?」，全船異口同聲答：「有」💪🏻，好強嘅氣勢💪🏻，最後嘅1500米先係成個比賽嘅重點！
最後嘅1500米，姐係由大老山公路橋底前嘅灣位至石門龍舟訓練中心嘅距離，我地不斷加力，慢慢拉近同前面四線嘅距離，去到第一個橋底，我地仲係處於一個落後嘅位置，大家都唔敢鬆懈，俾盡200%力繼續扒，當然隔離船見到我地咁俾力，佢地就更加用力，一直平排咬住咬住，去到孖橋前都只係僅僅head住條龍鬚，「丫~~~~」、「頂住丫~~~」、「到嫁啦~~~~」我地不斷叫，叫到都唔知自己叫緊咩啦，大家都只係知，一收力就冇嫁啦，完全俾盡曬身上僅餘嘅氣力，衝左線都唔敢停，直至舵手叫：「衝左線啦！」先開始望下隔離，一齊衝線wor....第一刻嘅心情，真係好忐忑，究竟鹿死誰手呢? 後尾有人話我地第三，我地先敢舉槳慶祝~wow~🏆
人生總要衝動過～唔扒唔知身體好~
多謝隊員們嘅支持同努力，少咗任何一個，今次都唔會成事！
嚟緊要繼續努力丫！💪🏻💪🏻
#龍舟 #DragonBoat
#半馬 #HalfMarathon #21K
#我係運動人
Search